سوپای ئیسرائیل دانپێدانانی چەند چەکدارێکی دەستگیرکراوی یەکەی “رەزوان”ی سەربە حزبوڵڵای لوبنانی بڵاوکردەوە؛ چەکدارەکان باس لە رووخانی ورەی هێزەکانیان دەکەن و دەڵێن “بە زۆر” رەوانەی بەرەکانی جەنگ دەکرێن و حزبوڵڵا تەنیا بۆ پاراستنی بەرژەوەندییەکانی ئێران دەجەنگێت.
3ی نیسانی 2026، ئەفیخای ئەدرەعی گوتەبێژی سوپای ئیسرائیل رایگەیاند، لە کاتی ئۆپەراسیۆنە زەمینییەکانی باشووری لوبنان، ژمارەیەک چەکداری یەکەی “رەزوان”ی سەربە حزبوڵڵایان دەستگیرکردووە کە پلانیان هەبووە مووشەکی دژە تانک ئاراستەی هێزەکانی ئیسرائیل بکەن، دواتر بۆ لێکۆڵینەوە رەوانەی یەکەی 504ی هەواڵگری کراون.
بەگوێرەی ئەنجامی لێکۆڵینەوەکان کە سوپای ئیسرائیل بڵاوی کردووەتەوە، چەکدارە دەستگیرکراوەکان دانیان بەوە داناوە کە “ورەی چەکدارانی حزبوڵڵا لە باشووری لوبنان لەوپەڕی نزمی دایە.” یەکێک لە چەکدارەکان دەڵێت: “حزبوڵڵا تەنیا بۆ پاڵپشتیی رژێمی ئێران و بۆ تۆڵەسەندنەوەی عەلی خامنەیی هاتووەتە ناو ئەم جەنگە.”
لە بەشێکی دیکەی دانپێدانانەکاندا هاتووە، زۆربەی چەکدارەکان بە ناچاری و بەبێ ویستی خۆیان براونەتە بەرەکانی جەنگ. چەکدارێک دەڵێت: “کەس وزەی شەڕکردنی نەماوە، دوای ساڵ و نیوێک لە جەنگ، دۆخەکە زۆر خراپتر بووە، کەس ناتوانێت بە حزبوڵڵا بڵێت نایەم بۆ شەڕ، چونکە بە زۆر دەمانبەن.”
ئەم دانپێدانانانە لە کاتێکدا بڵاودەبنەوە کە ئیسرائیل هێرشە زەمینی و ئاسمانییەکانی بۆ سەر پێگەکانی حزبوڵڵا لە لوبنان چڕتر کردووەتەوە و باس لە تێکچوونی ریزەکانی ئەو گرووپە دەکرێت.
چەکدارانی حزبوڵڵا لە رووبەڕووبوونەوە زەمینییەکاندا پشت بە تاکتیکی گرووپە بچووکەکان و کەمینە ستراتیژییەکان دەبەستن، وێڕای جیاوازیی هێزی سەربازی، توانایەکی زۆریان لە بەڕێوەبردنی شەڕی مەودا کورتدا هەیە.
دیارترین خاسیەت و شێوازەکانی شەڕکردنی حزبوڵڵا بریتین لە:
-رووبەڕووبوونەوەی زەمینی: ئەمە گۆڕەپانی سەرەکییە بۆ پێشاندانی هێز و ئیرادەی شەڕکەری چەکدارەکانیان.
-تاکتیکە جۆرییەکان: بەکارهێنانی گرووپی بچووک بۆ ئەنجامدانی هێرشی خێرا (لێدان و پاشەکشە) و دانانی کەمین.
-پڕچەککردن و مەشق: پشت بە تۆڕێکی مەشق و پشتیوانیی بەردەوام دەبەستن، لەگەڵ بەکارهێنانی فڕۆکەی بێفڕۆکەوان (درۆن) و مووشەک.
-شێوازی کەمین: جەختکردنەوە لەسەر راکێشانی هێزە پێشڕەوەکانی بەرامبەر بۆ ناو ئەو کەمینانەی کە پێشوەختە ئامادەکراون.
ئەم شێوازە رێگەیان پێ دەدات لە مەودایەکی کەمەوە مامەڵە لەگەڵ دۆخەکە بکەن و توانایەکی بەرچاویان لە بەڕێوەبردنی شەڕی مەیدانیی راستەوخۆدا هەبێت، سەرەڕای بوونی جیاوازییەکی زۆر لە هێزی سەربازیی گشتیدا.
