بنیامین ناتانیاھۆ، سەرۆکوەزیرانی ئیسرائیل فەرمانی بە سوپای وڵاتەکەی کرد لە ژێر ناوی “ناوچەی ئەمنی” بەشێک لە باشووری دابڕێنێت، هاوکات دۆناڵد ترەمپ رایدەگەیەنێت، دوای 34 ساڵ گفتوگۆی راستەوخۆ لەنێوان سەرکردەکانی ئیسرائیل و لوبنان ئەنجام دەدرێت.
نووسینگەی بنیامین ناتانیاھۆ، سەرۆکوەزیرانی ئیسرائیل درەنگانی شەوی چوارشەممە رایگەیاند، ناتانیاھۆ فەرمانی بە سوپا کردووە ناوچەی ئەمنی لە باشووری لوبنان فراوان بکەن، ئەمەش لەکاتێکدایە شەڕ و پێکدادانەکان لەگەڵ حیزبوڵڵا بەردەوامن.
هاوکات لەگەڵ ئۆپەراسیۆنە سەربازییەکان، هەوڵە دیپلۆماسییەکان بۆ گەیشتن بە ئاگربەست بەردەوامن. رۆژی سێشەممە، بۆ یەکەمجار لە دوای چەندین دەیەی رابردوو، نوێنەرانی ئیسرائیل و لوبنان لە واشنتن گفتوگۆی سیاسیی راستەوخۆیان ئەنجام دا. ناتانیاھۆ دەڵێت ئامانجی ئەم گفتوگۆیانە “داماڵینی چەکی حیزبوڵڵا و بەدیهێنانی ئاشتییەکی بەردەوامە”.
لای خۆیەوە دۆناڵد ترەمپ، سەرۆکی ئەمریکا لە پۆستێکدا لە سۆشیاڵ میدیای “تروس سۆشیاڵ” رایگەیاند، رۆژی پێنجشەممە گفتوگۆ لەنێوان ئیسرائیل و لوبنان بەڕێوە دەچێت. ترەمپ ئاماژەی بەوە کرد: “هەوڵ دەدەین فەزایەک بۆ هەناسەدان لەنێوان ئیسرائیل و لوبنان دروست بکەین”. هەروەها وتیشی: “ماوەیەکی زۆرە، نزیکەی 34 ساڵە سەرکردەکانی هەردوو وڵات قسەیان نەکردووە، ئەوەش رۆژی پێنجشەممە روو دەدات”.
ناتانیاھۆ ئاشکرای کردووە کە ناوچە ئەمنییەکە بەرەو رۆژهەڵات و بناری چیای شێخ فراوان دەکرێت، بە ئامانجی پاراستن و پشتیوانیکردنی کۆمەڵگە دروزەکانی ئەو ناوچەیە کە وەک لایەنی نزیک لە ئیسرائیل هەژمار دەکرێن. ئەم زنجیرە چیایە بە درێژایی سنووری سووریا و لوبنان هەڵکەوتووە و دەگاتە بەرزاییەکانی جۆلان.
ئەمە لەکاتێکدایە، حکوومەتی لوبنان کە دەڵێت لایەن نییە لە ململانێی نێوان ئیسرائیل و حیزبوڵڵا، داوای راگرتنی دەستبەجێی شەڕ و کشانەوەی هێزەکانی ئیسرائیل لە باشووری وڵاتەکەی دەکات.
