وەزیری پەروەدەی ئێران دەڵێ، بەهۆی جەنگەوە 20 قوتابخانە بە تەواوی خاپوور بوون؛ ئاماژە بەوەش دەکات، تاوەکی مانگی ئەیلوول، نۆژەنکردنەوەی قوتابخانەکان تەواو دەبێت.
ئەمڕۆ چوارشەممە 22-04-2026، عەلیڕەزا کازمی، وەزیری پەروەردە و فێرکردنی ئێران باسی لە قەبارەی زیانەکانی 40 رۆژ جەنگ کرد و رایگەیاند، نزیکەی هەزار و 300 قوتابخانە لە سەرانسەری وڵاتەکە زیانیان بەرکەوتووە کە 20ـیان بە تەواوی خاپوور بوون.
بەگوتەی عەلیڕەزا کازمی، بڕیارە پرۆسەی نۆژەنکردنەوەی قوتابخانە زیانلێکەوتووەکان تاوەکو مانگی ئەیلوولی ئەم ساڵ تەواو بێت.
وەک وەزیری پەروەردەی ئێران دەڵێ، جگە لە پارەی تەرخانکراو لەلایەن حکومەتەوە، تاوەکو ئێستا زیاتر لە 140 ملیار تمەن هاوکاریی خەڵکی، بۆ نۆژەنکردنەوەی قوتابخانەکان کۆکراوەتەوە.
رۆژی 28ـی شوباتی 2026، جەنگی ئیسرائیل/ئەمریکا لەگەڵ ئێران بە هێرشێکی بەرفراوان بۆ سەر تاران دەستیپێکرد و دوای 40 رۆژ بەردەوامی، ئاگربەستێکی دوو هەفتەیی راگەیێندرا کە بەرەبەیانیی ئەمڕۆ کۆتایی دەهات، بەڵام دۆناڵد ترەمپ، سەرۆکی ئەمریکا لەسەر داوای پاکستان ماوەکەی درێژ کردەوە.
